| |
 |
|
O círculo amarelo sinala o lugar no que se atopa a Pedra da Grelo. Como
se pode apreciar na fotografía do SIGPAC, áchase a pouca distancia do
porto guardés e, a súa vez, practicamente pegada a área rochosa da
costa, da que apenas a separa un brazo de mar duns 15 metros.
Este rochedo queda totalmente submerxido unicamente coas mareas máis
vivas e a oleaxe lle afecta fundamentalmente cando o mar está moi picado
ou coincide coas mareas altas.
A distancia á que se atopa da senda é duns 150 metros.
|
|
| |
 |
|
Dende hai uns poucos de anos, é utilizado
polo corvo mariño real (Phalacrocorax carbo), como pousadeiro e
zona de descanso, sendo frecuente ver unha media duns 10 exemplares
pousados na súa superficie, onde aproveitan para secar as ás
extendéndoas co fin de expor a máxima superficie posible.
A presenza de corvos mariños neste rochedo vai aproximadamente dende o
mes de setembro ata o mes de maio, xa que logo a maioría destas aves
emigran cara ao norte europeo.
Para a maior parte da xente que pasea pola senda litoral, que vai
paralela a este rochedo, a presenza destas aves pasa desapercibida ou
non lles resulta de interese, tal vez máis polo descoñecemento que por
outra cousa, pero para os que queiran, sería aconsellable que levaran
con eles uns prismáticos porque ao longo de toda a senda, que vai dende
o porto da Guarda ata a praia de Camposancos, van poder ver diferentes
aves que agora mesmo lles pasan desapercibidas como poden ser, ademais
dos corvos mariños (non confundir cos corvos de terra) algunha
que outra garzota; gabitas; mazaricos; píllaras;
etc. |
|
