Actualizado o 10-09-2011

COLABORAMOS NUNHA SAÍDA GUIADA

COAS ACTIVIDADES DE CRUZ VERMELLA

    O 2 de setembro pasado, ANABAM colaborou coa Cruz Vermella do Baixo Miño nunha das actividades programadas pola mesma.

   A actividade consistiu na visita a estación Ornitolóxica da nosa asociación onde observaron o material exposto e recibiron unha pequena explicación do que alí había. Logo con prismáticos e telescopios saíron ao exterior para observar algunha das aves acuáticas que había na zona. Deseguido trasladámonos ata a Aula da Natureza "Muíños das Aceñas" onde recibiron unha nova explicación do que alí había e participaron activamente na identificación das diferentes especies de anfibios e pegadas que había nos paneis expostos ao público. A xornada remataría na zona de xogos existente a carón do río Tamuxe.

ADEGA VISITA

O BAIXO MIÑO

      O sábado 2 de abril, membros e simpatizantes de ADEGA, achegáronse ata o Baixo Miño, aproveitando a mesma para ver a Aula da Natureza "Muíño das Aceñas", recentemente inaugurada. Nesta visita estiveron acompañados polos socios Noé Ferreira e Ricardo Portela que lles explicaron os pormenores da aula.

      Posteriormente, dirixíronse cara ás faldas do Trega para visitar o "Bosque para unha bolboreta", onde volveron recibir as explicacións dos compañeiros de ANABAM citados anteriormente. Todos eles tiveron a oportunidade de observar algunha eiruga, de bo tamaño, pertencente á Charaxes jasius, que se atopaba nunha das follas dos érbedos e á que se dedica este bosque.