Primeira actualización o 14-02-2012

Última actualización: 14-04-2012

A Anemonia sulcata ou viridis, pertence ao grupo dos Cnidarios (ao que pertencen tamén as actinias, os corais e as medusas, entre outros). É un animal moi  abondoso, vive en grupos, en toda a costa do Baixo Miño, onde se presenta fundamentalmente en dúas coloracións: unha castaña e outra verde, sendo a máis abondosa a primeira das formas citadas.

   Vémolas nas fendeduras e pozas, practicamente no límite inferior da intermareal, principalmente sobre material rochoso. A miudo en agrupamentos que poden conter dende dúas ou tres anémonas ata un bó número de exemplares.

     A diferenza das actinias, as anémonas posúen uns tentáculos longos que non se poden ocultar totalmente no interior do animal, coma sucede con aquelas. As anémonas son urticantes para moitos pequenos animais mariños dos que se alimenta.. A nós, agás que sexamos extremadamente sensibles, non nos afectan.

        Estes animais poden vivir certo tempo fora da auga, entón, cando están agrupados, parecen formar unha masa de aspecto abrancazado.

         As anémonas son carnívoras, é habitual observar exemplares, como pequenos mexillóns, na súa "boca".

    A cor das anémonas débese a algas microscópicas que viven en simbiosis con elas: son as Zooxanthellae, algas unicelulares que axudan á anémona nos procesos de dixestión.

     Detalle dos tentáculos da anémona. Obsérvese a cor verde aterciopelada e os extremos de cor púrpura.

     Os tentáculos poden repregarse cara ao interior do animal, pero non quedarán ocultos, coma se pode apreciar na anémona da dereita. Tamén, coma sucede na da esquerda, cando están fóra da auga non son capaces de erguer os tentáculos e estes caen lateralmente.