Estimados colaboradores:

Como a maioría de vós xa sabedes, o proxecto "Bolboretas do Baixo Miño" atopase na súa recta final. Os datos obtidos son suficientes para representar mais do 90% das bolboretas diúrnas existentes na zona.

   Por este motivo quérevos pedir axuda en dúas cuestións fundamentais para conseguir rematar este traballo coa calidade que se merece. Todos os que vivides ou visitades de vez en cando esta comarca, sodes as persoas idóneas para este mester:

1ª Cuestión. Falando con Agustín, decidimos que a publicación estivera ilustrada con fotografías das especies no seu medio natural. Todos aqueles que colaboren coas súas imaxes aparecerán nun agradecemento especial, onde despois do seu nome, poderase ver os números de paxina onde aparecen as súas fotos. Da mesma maneira, ao pe de cada foto, tamén se poderá ler o nome do autor, xunto co concello onde se fixo (sempre que sexa no Baixo Miño).

Para escoller as fotos a publicar (non hai numero limite por autor) seguiranse os seguintes criterios de selección, polo orden aquí sinalado:

1º A calidade.- Este criterio é o primeiro, non porque busquemos imaxes dunha calidade extraordinaria, simplemente é para homoxeneizar a calidade das ilustracións da publicación. Para que unha fotografía sexa válida, terá que ter a calidade media do resto das imaxes seleccionadas.

2º A localización.- As imaxes realizadas dentro da Comarca do Baixo Miño, terán prioridade sobre outras. Daquelas especies que non se consiga unha fotografía nun dos concellos do Baixo Miño, optarase por imaxes foráneas realizadas o máis preto posible da zona.

3º A composición ou o estado do exemplar.- Entre aquelas fotografías da mesma especie que cumpran coa calidade mínima necesaria e foran realizadas dentro da comarca, seleccionarase aquela, ou aquelas, que teñan unha maior beleza na súa composición ou que o exemplar mostrado estee en mellor estado para representar á especie.

4º O autor. Buscando que todos os colaboradores que queiran participar teñan representación na publicación, cando varias fotos cumpran cos criterios anteriores, escollerase aquela imaxe que pertenza a un autor aínda sen representación entre as fotos xa seleccionadas. Non hai número de fotografías máximas por autor, só criterios de selección. Se un autor ten moitas imaxes coa calidade solicitada e feitas dentro do Baixo Miño, ten moitas máis posibilidades de que aparezan as súas fotos.

     Tamén serán útiles imaxes de estados inmaturos, cópulas, parasitismos ou calquera outra cousa relacionada coas bolboretas e a súa bioloxía. Tamén lémbrovos que non só serven as fotos feitas no Baixo Miño, usaranse foráneas para as especies que non atopemos imaxe da zona, así que mandade tamén aquelas que queirades de fóra da comarca.

2ª  Cuestión. Coma eu este ano non me poderei desprazar ao Baixo Miño mais que unha ou dúas veces, necesito da vosa axuda agora máis que nunca. Para cubrir o máximo posible os mapas de distribución das especies e atopar algunhas das bolboretas que aínda non apareceron é necesario facer saídas entomolóxicas. E por isto que sería necesario que fagades saídas "entomo-fotográficas" pola comarca. Só visitando aquelas cadrículas con menos especies unha ou dúas veces por mes, poderemos sumar novos puntos para os mapas e quizais, con un pouco de sorte, algunha das especies aínda non atopadas na zona.

En fin, nada máis polo momento, que non e pouco. Por outro lado, xa sabedes que estou a vosa disposición para aclararvos calquera dubida que teñades sobre este tema e tamén para clasificarvos todas as imaxines de bolboretas galegas, diúrnas ou nocturnas, que teñades. ¡Ah! é tamén aqueles Ascalaphos que teñades; estes neurópteros son os únicos insectos non bolboretas que tamén estudo.

Quedo a espera de calquera comentario e das primeiras fotografías que queirades enviar para a selección.

Unha aperta para todos e boas fotos.

Suso Requejo (Pontevedra)

Proxecto: LEPI-ATLAS.

Proxecto: Bolboretas do Baixo Miño