|
As Asociacións Cultural “San Mamed” e de Veciños “A Muruxeira” da parroquia
de Pedornes xunto con ANABAM organizan, en colaboración co Grupo de Ecoloxía
e Evolución-Divulgare da Facultade de Bioloxía da Universidade de Vigo e o
Parque Nacional Marítimo-Terrestre das Illas Atlánticas de Galicia a
exposición fotográfica “Sombras asombrosas”.
A
devandita exposición poderá visitarse os días
5, 6, 8,
15, 22 e 29 de xaneiro
de 16.00 a
21.00 h.
Os paneis desta exposición pertencen ao Grupo de Ecoloxía e
Evolución-Divulgare da Universidade de Vigo e foron elaborados con motivo da
celebración do Ano Internacional dos Morcegos. Para iso, contaron co apoio
de investigadores e fotógrafos de institucións como o Instituto de Ecoloxía
e Sistemática de Cuba, o Colexio Oficial de Biólogos de Galicia e o afamado
Instituto de Ecoloxía Experimental da Universidade de Ulm (Alemaña).
Os morcegos son os únicos mamíferos voadores. Os seus hábitos nocturnos e
aparencia estraña fixéronos protagonistas de mitos e supersticións. Con
todo, teñen unha importancia vital no funcionamento dos ecosistemas e
repercuten positivamente na economía e no benestar social.
Os morcegos representan case a quinta parte das especies de mamíferos que se
coñecen, e hai especies que nunha soa noite forman agrupacións de centos e
miles de individuos. Actúan como reguladores biolóxicos das poboacións de
insectos, polinizan as flores e dispersan as sementes de centos de especies
de plantas tropicais. Ademais, a maioría das especies de morcegos oriéntanse
por medio do son, e os estudos sobre este tema contribuíron ao tratamento de
enfermidades neurolóxicas e do sistema auditivo nos seres humanos.
A pesar da súa gran importancia, os morcegos seguen estando entre os grupos
de animais peor coñecidos e menos comprendidos, o cal levou a algunhas
especies ao bordo da extinción. O coñecemento das súas habilidades e a súa
función ambiental é clave para situalos no lugar que se merecen como
arquitectos dos ecosistemas. Con esta exposición fotográfica preténdese
achegar á sociedade o apaixonante universo destes animais tan singulares, os
morcegos. |
