Oxalis pes-capreae

    O "chuchamel", como lle chaman os rapaces nesta zona, aínda que este nome tamén se emprega para outras especies como a madreselva, é planta moi coñecido dende tempos antigos porque o seu pedúnculo floral que ten un sabor amargo invita a probalo.  Planta exótica, ou sexa, non autóctona, procede de Sudáfrica, que aparece amplamente distribuída por toda a comarca e por tódalas partes. Moi abondosa. É das primeiras plantas que vemos no comezo de ano.

Un insecto, do grupo dos dípteros, aproveita a súa actividade nunha tarde calurosa deste mes de xaneiro, para alimentarse do néctar da flor.

Carpobrotus edulis

    Aínda que xaneiro non é a mellor época de floración para esta especie, si observamos neste mes de xaneiro un bo número de flores en diferentes matas que se atopan a carón do borde litoral.

    Ao igual que a anterior, esta especie tamén é orixinaria de Sudáfrica e constitúe unha seria ameaza para as plantas autóctonas por ser moi invasiva. É abondosa en toda a costa baixomiñota, así coma na ribeira fluvial de ámbalas dúas marxes. As flores aparecen en dúas "versións": amarelas e carmíns.

Silene vulgaris

    É unha especie tapizante, de follas estreitas, cálice globosa e pétalos cor branco, contendo 10 estames. Aparece en toda a costa do Baixo Miño abondosamente. Na senda litoral podémos ver algúns exemplares en flor, aínda que este, ao igual que a especie anterior, non é o mellor momento da floración.