Honckenya peploides

Está incluída no PES (Plan de Especial Seguimento) desenvolvido por ANABAM, que é o mesmo que dicir que hai unha preocupación prioritaria por parte desta asociación para a súa protección e conservación.

Na praia portuguesa de Moledo (municipio de Caminha) está asentada na zona sur, repartida en catro manchas separadas unhas das outras por escasos metros, o que significa que non debe haber moitos anos na que toda ela constituiría unha única e ampla unidade.

Puidemos observar que o estado no que se atopa é moi precario e o pisoteo dos usuarios da praia está a mermar a súa presenza polo que ANABAM, estudiará algún plan urxente para tratar de poñer en práctica e preservar a especie antes de que sexa demasiado tarde.

Á dereita da fotografía (obtida o luns 27 deste mes de xuño) pode observarse o estado no que se atopa unha das manchas de Honkenya na praia de Moledo, cando aínda o areal non está moi utilizado. Se non se toman medidas, a especie desaparecerá en poucos anos.

Actualizado o 28-02-2011

As últimas marusías déronlle un duro golpe á poboación de Honkenya peploides

sita na parroquia de Mougás (concello de Oia)

En abril do pasado ano comentamos os danos sufridos pola única poboación de Honckenya peploides que hai no Baixo Miño, xusto a carón do Camping "O Muíño" da parroquia de Mougás. A súa área de distribución e moi pequena, ocupando apenas uns 70 metros cadrados, e daquela unha boa parte das súas raíces quedaran ó descuberto. Mais tarde, no mes de xullo, varios pes foron arrincados polos usuarios da praia. Nembargante, o maior estrago produciuse fai uns días coa forte marusía que afectou a toda a costa atlántica galega. Esta vez, practicamente a totalidade das raíces quedaron ó descuberto pola forza da auga e soamente na parte mais alta do norte (polo medio pasa o carreiro que utilizan os usuarios do citado cámping para acceder á propia praia) puidemos fotografar algúns brotes nas raíces espidas. Normalmente, a Honckenya ten superado tanto os ataques do mar como os dos usuarios da praia, pero córrese un serio risco de que desapareza do Baixo Miño. Polo tanto, é moi necesario coñecela e protexela, labores nas que todos podemos axudar para preservar a biodiversidade da nosa comarca.

Actualizado o 10-07-2010

ARRANCADOS VARIOS PES

É a única poboación desta especie que hai no Baixo Miño. Atópase no Concello de Oia, parroquia de Mougás, a carón do Camping "O Muíño". Ocupa unha superficie duns 70 metros cadrados. ANABAM a cataloga como especie en perigo para a comarca. En varias ocasións puxemos panéis informativos da mesma e sempre deu resultado. Pero este ano non o fixemos por falla de tempo e, posiblemente por esta falta de información, as consecuencias vémolas na fotografía: algunhas matas foron arrincadas. É pouca cousa pero podería ser máis. Así que, nos vindeiros días procederemos a poñer sendos carteis informativos co obxecto de que os usuarios desta pequena praia coñezan que esta é unha especie amenazada na nosa comarca, que nesta non hai outro lugar onde apareza e que entre todos temos que protexela. Ás veces so é cuestión de que a xente estea informada porque o descoñecemento pode ser o peor inimigo do patrimonio natural.

Honkenya peploides na pequena praia de Mougás. Esta especie xa estivo presente na praia de Camposancos pero despareceo da mesma hai moitos anos. O botánico e xesuíta Baltasar Merino, xa a citaba no ano 1905 nesta última praia. Nós nunca chegamos a vela aí. Pero ensaiamos varios proxectos para intentar reintroducila, de momento sin éxito.

Actualizado o 05-04-2010

Parte da poboación de Honckenia peploides foi danada polas últimas marusías

Por Manuel A. Pombal Diego "Peque"

No paseo costeiro realizado o pasado venres 2 de abril visitamos a pequena praia que se encontra enfronte do cámping “O Muiño” na parroquia de Mougás (concello de Oia). Esta é a única zona de todo o Baixo Miño na que crece unha pequena planta de follas carnosas e flores brancas chamada Honckenia peploides. Este fito fixo que Anabam realizara unha campaña informativa co fin de dar a coñecer a súa presenza para tentar protexela e conservala, dado que é lugar de paso habitual tanto de pescadores e paseantes como de todas aquelas persoas que baixan a praia dende as instalacións do propio cámping.

A poboación de Honckenia atópase por riba do límite que alcanza a auga durante a preamar. Nembargante, a coincidencia, estes últimos días, de mareas vivas cunha forte marusía fixo que durante a preamar o nivel da auga alcanzase cotas moi superiores as normais, polo que unha parte das Honckenias se viron afectadas. A forza das ondas arrastrou parte da area que cubría as raíces dunha boa parte das plantas localizadas na marxe suroeste da poboación, danando algunhas e deixando outras á vista. Pode que incluso arrastrara algunhas das plantas que delas brotan posto que nesa zona son menos as que agora quedan. Mágoa que se vira afectada a única poboación desta especie presente no Baixo Miño.