|
Coa chegada do outono, e por suposto das primeiras chuvias, créase o clima
axeitado para que os anfibios inicien os prolegómonos de perpetuación da
especie. Aproveitando a presencia de salamandras comúns, que se deixan ver
precisamente chegada esta época, nunha finca particular en Camposancos (A
Guarda), ocurríusenos na tempada pasada levar a cabo un estudio sobre os
exemplares presentes na mesma. O desenvolvemento deste estudio, o protocolo
a seguir, os datos que se queren obter e outras variables, non están
definidas. Polo de agora limitarémonos a ir recollendo información diversa para ver ata
onde nos levan as mesmas.
 
Foto esquerda
obtida o 02 /02/2008.............foto dereita obtida o 16/10/2008
Como podemos apreciar polas fotografías, se analizamos e comparamos as
manchas, vemos que se trata do mesmo individuo fotografado en dúas tempadas
diferentes: a da esquerda na tempada 2007/2008; a da dereita nesta tempada
2008/2009, con 8 meses de diferencia entre unha e outra. Gracias a que
as manchas son permanentes e non cambian de forma dunha a outra tempada,
este estudio vainos permitir, por exemplo, saber se hai un cambio de
individuos presentes nunha determinada área, de producirse ese cambio, canto
tempo se precisa para que se produza; se os individuos son fieles a unha
mesma zona, etc.
Este estudio pode ser extensivo a calquera que teña unha finca no rural,
máis ou menos aberta con respecto ao exterior para que as posibles
saramagantas poidan decidir libremente onde ir.
As tres fotografías pertencen a outros tantos exemplares
fotografados o mesmo día, e practicamente á mesma hora,
na finca onde se leva a cabo o estudio.
Obsérvese que os diferentes debuxos das manchas, así como a súa distribución
no corpo, permiten identificar a cada exemplar. Cada un deles foi bautizado
cun nome: ó da esquerda Paralela (polas manchas en paralelo que
presenta ao longo do corpo); o do centro Nota Musical (pola mancha
que ten no dorso, entre as dúas patas dianteiras, que ao responsable do
estudio recórdalle unha nota do pentagrama); a terceira saramaganta
púxoselle de nome Densa (pola puntuación densa que ten na parte
central do dorso).
Non sabemos a onde nos levará
este estudio, tal vez a saciar a nosa curiosidade durante uns anos ou tal
vez a sacar algunha conclusión ou algunha nova idea que nos ronde polo maxín.
En calquera caso, este pode ser o inicio dun gran día..., ou non.
Agustín Ferreira Lorenzo
|
