FERVENZA DO POZO DO INFERNO

Texto: Agustín Ferreira Lorenzo

Imaxes:  Mª Consuelo González de Dios

Manuel A. Pombal Diego

        Encaixoado, baixa o rio da Cal por Fornelos, entre paredes graníticas, ás veces verticais. Resulta dicícil o desprazamento por el. Tratar de ir polas marxes tamén é dificultoso, pero pouco a pouco conseguimos chegar a un dos puntos máis axeitados para poder observar a Fervennza do Pozo do Inferno, un salto que supera ben os 10 metros de altitude, así a ollo, e que remata nunha poza froito do impacto da auga contra o leito do río, modulada ao longo de centos de anos.

      A saída do grupo de traballo de ANABAM, do pasado sábado 21 de xaneiro, efectuámola á unha das fervenzas máis altas da comarca do Baixo Miño. Atópase no río da Cal, na parroquia de Fornelos. A espectacularidade é impresionante pero tamén pode resultar perigosa se non tomamos as necesarias precaucións, pois non é doado buscar un lugar axeitado para poder observala con certa comodidade.

    Unha das zonas para acceder a ela é polo Xestal, en Fornelos. Por aí desprazouse o equipo de campo que formou parte do grupo de traballo: Carlos Angílica; Luis Dorado; Agustín Ferreira; Antón Ferreira; Mª Consuelo González; Manuel A. Pombal e Ricardo da Silva.

    Coordenadas UTM:

      X: 514110

      Y: 464541

     Nesa xornada de traballo dedicámola fundamentalmente a obter información gráfica, quedando para outro día continuar recollendo outro tipo de información.

     Dende o alto da fervenza, e extremando ao sumo as precaucións, as pedras estaban moi esvaraízas e unha caída pode ter graves e irreparables consecuencias, obtivemos esta vista en perpendicular do denominado Poza do Inferno.

     Vista frontal da fervenza, esta presenta o seu maior esplendor cando as chuvias son abondosas, mais, aínda que levamos bastantes días sen que estas fagan acto de preseza, a cantidade de auga que leva é apreciable e amosa a espectacularidade da mesma.

       Non é doada a observación desta impresionante xoia da comarca. Cremos que habería que habilitar sendeiros de acceso, seguros, que permitiran gozar da observación destes monumentos naturais.

    Oia e O Rosal, posúen un bo número de fervenzas que ben podería habilitarse o seu entorno, dotando de medidas de seguridade e xestionando a súa protección a través dun EPIN, para, como se di agora, poñelas en valor.

     Precisamente ANABAM ten entre os seus obxectivos falar cos responsables das Comunidades de Montes nos que se atopan estas fervenzas para tratar de crear a Ruta das fervenzas do Baixo Miño, un proxecto que levamos en mente hai varios anos pero que aínda non tivemos oportunidade de ocuparnos plenamente del como quixeramos.

     Membros do equipo de campo no alto da fervenza, deleitándose coa magnífica paisaxe natural e recollendo información gráfica.

     Augas arriba da anterior fervenza, e augas abaixo, tamén hai máis fervenzas das que faremos novas reportaxes e comentarios noutra ocasión..