Observacións: O propietario desta arbore é o señor Manuel que aos 97 anos segue contando historias dos seus tempos ou o que é o mesmo, da súa vida. Tamén é solicitado por algún veciño cando se precisa da súa boa memoria, como recorda unha veciña que non sabendo cal era o seu parente nunha foto antiga  acudiu ao señor Manuel.

 Tamén van onda el os que queren coñecer cantigas dos tempos mozos de Manuel, pois aínda ten memoria para cantalas.

   A árbore, conta o señor Manuel, foi plantada polo seu irmá maior cando era mozo.  O carballo non é moi alto, pero estirou as súas polas ao máximo e teñen un tamaño impresionante .

 Tan agradable como ver unha árbore tan extraordinaria é falar co señor Manuel e escoitar as súas lembranzas.

No mediodía do 25 de abril,  o xa moi deteriorado tronco do centenario ‘Carballo do Norte’‘ non foi quen de soportar o tremendo peso das súas enormes pólas e caeuse con grande estrépito.

     É a segunda baixa que temos dende que comezamos esta andaina de ‘árbores e arbustos do Baixo Miño’. Neste caso a baixa prodúcese por causas naturais, non como producto da actividade humana. Naturalmente, como ten que ser, chegou a fin dunha árbore centenaria e monumental.

    Queremos deixar constancia nesta reportaxe do tamaño das súas pólas máis senlleiras, que causaban admiración a todo o que se achegaba a observalo.

     Tomamos as medidas de dúas das dezaoito que nacían do seu eixo, dezaoito nada menos, iso pode dar a idea da inmensa ramificación que se desenvolveu nesta árbore.