68 alumnos da Escola Infantil Vilalaura, de Vigo, de entre 4 e 5 anos, visitaron o monte Santa Trega nunha das moitas visitas que ao cabo do ano organiza ANABAM cos escolares para divulgar os valores deste monte e darlles a coñecer a súa riqueza arqueolóxica, paisaxística e inmaterial (lendas e tradicións).

            Os escolares, malia súa curta idade, amosáronse curiosos e interesados por saber como vivían os que ocuparon esta altura, disfrutaron co enigmático “volcán’ que esconde unha das rochas do monte, acariñaron un vello sauce no que aniña un paxariño e visitaron a ermida e o museo, onde descubriron novas historias que lles contou o monitor de Anabam.

            A visita foi valorada positivamente polos profesores que destacaron a complicidade do guía de Anabam cos escolares para conseguir centrar a atención dos mesmos no que se lles estaba a contar.

COLEXIO  NEIRA VILAS

(GONDOMAR)

   A Asociación Naturalista Baixo Miño, Anabam, continúa coas actividades de divulgación e coñecemento do monte Santa Trega que se promoven por este colectivo desde hai uns quince anos. Os meses de maio e xuño son os máis demandados nas visitas escolares, coincidindo cos últimos meses do curso escolar e a melloría do tempo, que sempre garante unha visita didáctica que se prolonga máis alá da mañá, porque moitos dos colexios se desprazan, posteriormente, e seguindo a recomendación do colectivo ecoloxista, ao piñeiral de Camposancos para concluír a xornada.

            Entre as últimas visitas está a efectuada por 55 alumnos e 6 profesores de Primaria do colexio Neira Vilas, de Gondomar.

            Como é habitual as visitas inícianse no Poboado galaico-romano para continuar un percorrido a pé ata o Museo pasando polo Púlpito e a Ermida de Santa Trega.

            A duración aproximada de cada visita didáctica é de hora e media, e os contidos acomódanse ao nivel escolar dos escolares, aos que se lles entrega tamén unha Guía didáctica a cor editada polo colectivo Anabam.

Visitas guiadas ao poboado castrexo do Monte Santa Trega........636.091.089

Escolares do colexio Padrenda, en Ourense, visitaron o pasado martes o monte Santa Trega. Foron en total 32 alumnos de 1º e 2º da ESO, acompañados de dous profesores que se achegaron a este monte da Guarda participando nunha da visitas guiadas que organiza ANABAM e que os levou pola historia, as lendas, as tradicións e a relixiosidade relacionada co monte Santa Trega.

            A xornada, que veo acompañada dunha climatoloxía idónea para facer este percorrido, comezou no poboado galaico-romano, para despois de coñecer as características do mesmo, e visitar os petroglifos, continuar a pé polo sendeiro do Vía Crucis monumental, do que tamén se ofreceron curiosas referencias, o mesmo que do Púlpito e do Facho. Os puntos de interese, tanto do exterior como do interior da ermida, a desembocadura do Miño e a visita ao Museo, completaron un percorrido de preto de hora e media.

            Os escolares ourensáns finalizaron a súa estadía na Guarda, xantando na praia do Muíño.