|
REGULAMENTO DE RÉXIME INTERIOR
DA
XUNTA CONSULTIVA DO PARQUE NATURAL DO MONTE ALOIA
Artigo 1º
A Xunta Consultiva do
Parque Natural do Monte Aloia, creada mediante o Decreto 31/2004, do 22
de xaneiro, polo que se crea a Xunta Consultiva do Parque Natural do Monte
Aloia, é un órgano colexiado adscrito á Consellería de Medio Ambiente e
Desenvolvemento Sostible, de colaboración coa Dirección Xeral de
Conservación da Natureza.
A súa composición e
réxime de funcionamento rexerase pola Lei 9/2001, do 21 de agosto, de
conservación da natureza, a Ley 30/1992; de 26 de noviembre,
del régimen jurídico de las administraciones públicas y del procedimiento
administrativo común, e o Decreto265/2007, do 28 de decembro, polo
que se modifica as composición das xuntas consultivas dos parques naturais
de Galicia , así como polo presente Regulamento de Réxime Interior e por
todas aquelas disposicións que lle sexan de
aplicación.
Artigo 2º
A
Xunta Consultiva terá a súa sé na Casa Forestal “Enxeñeiro Areses” do Parque
Natural do Monte Aloia. As reunións dos seus órganos de goberno poderanse
celebrar, non obstante, no lugar que en cada caso se determine.
Artigo 3º
1 -
A composición da Xunta Consultiva é a contida no Decreto 265/2007,
do 28 de decembro ou, no seu caso, aquela que se fixe na normativa de
aplicación.
2 -
Os órganos de goberno da Xunta Consultiva son o Pleno e a súa Comisión
Permanente.
3 - O Pleno estará composto pola totalidade dos membros, e a Comisión
Permanente polo presidente, o secretario e os vogais representantes da
Dirección Xeral de Conservación da Natureza, Entidade Local Menor de Pazos
de Reis, Comunidade Veciñal de Montes en Man Común de Rebordáns,
propietarios de predios no Monte Aloia, asociacións de protección da
natureza, e o director do Parque Natural, podendo ampliarse mediante acordo
tomado polo Pleno.
4 - As reunións periódicas ordinarias do Pleno celebraranse, como norma
xeral, unha no primeiro semestre e outra no segundo de cada ano.
Artigo 4º
1 -
Os membros titulares dos órganos colexiados (Pleno e Comisión Permanente)
poderán ser substituídos polos seus suplentes en casos de ausencia ou de
enfermidade, e en xeral cando concorra algunha causa xustificada.
2
- Os organismos, entidades e colectivos representados na Xunta Consultiva
designarán un suplente do titular, que os substituirá en caso de ausencia
nas sesións, acreditándoo perante a Secretaría do órgano colexiado.
Artigo 5º
1 -
As reunións de cada un dos órganos da Xunta Consultiva esixirán a previa
convocatoria por escrito a cada un dos seus compoñentes, con dez días de
antelación á súa celebración no caso do Pleno, e cinco días no da Comisión
Permanente, indicándose expresamente nela a orde do día que rexerá os
debates.
2 -
Será competencia do presidente a convocatoria das reunións, a fixación da
orde do día e mailo seu cumprimento, así como a orde de celebración dos
debates.
3 -
Con independencia das reunións ordinarias periódicas para o Pleno e a
Comisión Permanente, estes órganos reuniranse en sesión extraordinaria cando
así o soliciten alomenos a terceira parte dos seus membros, os cales haberán
de propoñer ao presidente por escrito as datas de celebración detallando a
relación de asuntos a tratar.
4 -
Así mesmo poderanse celebrar sesións extraordinarias cando, estando
reunidos tódolos compoñentes dalgún dos órganos da Xunta Consultiva, así se
decida por unanimidade. As reunións terán tamén o carácter de
extraordinarias cando nelas se traten temas específicos ou de oportunidade,
correspondendo neste caso a convocatoria ao presidente.
5 -
Para a válida constitución do órgano, para os efectos de celebración de
sesións, deliberacións e adopción de acordos, requirirase a presencia do
presidente e do secretario ou, de ser lo caso, daqueles que os substitúan. O
quorum para a válida constitución do órgano colexiado será o da
maioría dos seus compoñentes. De non existir quorum, o órgano
constituirase en segunda convocatoria media hora despois da sinalada para a
primeira, cos membros que estean presentes.
6 -
Os acordos tomaranse por maioría simple de votos, agás nos casos
contemplados no artigo 11.2 e nos apartados b) e l) do artigo 7º deste
Regulamento, que precisarán dunha asistencia de dous tercios da Xunta
Consultiva. Nestes últimos casos, se ao evacuaren o informe preceptivo as
dúas terceiras partes dos seus compoñentes mostrasen desconformidade con
algunha das súas propostas, o presidente devolverá á súa orixe a citada
proposta para a súa reconsideración. No caso de empate á hora de tomaren un
acordo, dirimirá o mesmo o voto do presidente.
7 -
O presidente, de seu ou a petición dalgún membro da Xunta Consultiva, poderá
incorporar ás sesións a persoas expertas nas materias que se vaian tratar,
quen terán voz mais non voto e só asistirán á parte da sesión na que
corresponda debater o asunto para o que se lles requira.
8 -
Non poderá ser obxecto de deliberación ou acordo ningún asunto que non
figure incluído na orde do día, a non ser que estean presentes tódolos
membros do órgano colexiado e sexa declarada a urxencia do asunto polo voto
favorable da maioría.
9 -
Aqueles que acrediten a titularidade dun interese lexítimo poderán dirixirse
á Secretaría da Xunta Consultiva para que se lles expida unha certificación
dos seus acordos.
Artigo 6º
1- De
cada sesión que celebre a Xunta Consultiva o secretario redactará acta, na
que se especificarán necesariamente os asistentes, a orde do día da reunión,
as circunstancias do lugar e tempo en que se celebrou, e os puntos
principias das deliberacións, así como o contido dos acordos adoptados.
2- Na
acta figurará, por solicitude dos respectivos membros do órgano, o voto
contrario ao acordo adoptado, a súa abstención e os motivos que a
xustifiquen, ou o sentido do seu voto favorable. Así mesmo, calquera membro
terá dereito a solicitar a transcrición íntegra da súa intervención ou
proposta, sempre que achegue no acto ou no prazo que sinale o presidente, o
texto que se corresponda fielmente coa súa intervención, facéndose así
constar na acta ou uníndose copia á mesma.
3- Os
membros que discrepen do acordo maioritario poderán formular voto particular
por escrito no prazo de corenta e oito horas, que se incorporará ao texto
aprobado.
4-
Cando os membros do órgano voten en contra ou se absteñan, quedarán exentos
da responsabilidade que, de ser o caso, poida derivarse dos acordos.
5- As
actas aprobaranse na seguinte sesión plenaria. Non obstante, o secretario
poderá emitir certificación sobre os acordos específicos que se adoptasen,
sen prexuízo da ulterior aprobación da acta. Nas certificacións das actas
emitidas con anterioridade á aprobación da acta farase constar expresamente
tal circunstancia.
Artigo 7º
Son
cometidos e funcións da Xunta Consultiva:
a)
Velar polo cumprimento das normas establecidas, promover posibles
ampliacións do Parque Natural, promover a construcción e acondicionamento
dos accesos precisos, administrar os fondos procedentes das axudas que á
Xunta Consultiva outorguen calquera clase de entidades ou particulares,
promover normas para a máis eficaz defensa e difusión dos valores e
singularidades do Parque Natural, elevar propostas e realizar cantas
xestións estime beneficiosas para o mesmo a través da súa función asesora e
consultiva.
b)
Aprobar o Plan de Ordenación dos Recursos Naturais, o Plan Rector de Uso e
Xestión, e demais normativa do Parque Natural, e as súas modificacións e
revisións, e velar polo seu cumprimento.
c)
Aprobar os orzamentos anuais de xestión do Parque Natural, vixiando a súa
exacta execución, e aprobar a memoria anual de xestión.
d)
Informar sobre os aproveitamentos forestais, tratamentos silvícolas e
labores de todo tipo que non estean contemplados nos traballos anuais
correspondentes ao Plan de Ordenación Forestal do Monte Aloia.
e)
Informar sobre a creación de novos cerramentos ou modificacións dos
existentes, así como da execución de calquera obra nova, de ampliación ou de
modificación das xa existentes, sen prexuízo das competencias propias
doutros organismos.
f)
Informar sobre a instalación de sinalizacións non previstas nos orzamentos
anuais de xestión.
g)
Informar tódalas actividades que vaian ter lugar no Parque Natural e que
requiran outorgamento, prórroga ou modificación de concesión, autorización,
permiso ou licenza.
h)
Informar sobre os traballos científicos e académicos que se vaian
desenvolver no Parque Natural.
i)
Emitir tódolos informes que lle sexan solicitados pola Consellería de Medio
Ambiente e Desenvolvemento Sostible.
k)
Instar, no uso das facultades da Xunta Consultiva, á Administración do
Estado, Comunidade Autónoma, Corporacións Locais ou calquera Ente Público
con competencia sobre os bens de dominio público, os montes de utilidade
pública, espazos protexidos e os de propiedade privada, incluídos no
territorio do Parque Natural, para acadar a legalización ou desaparición
das invasións, ocupacións, aproveitamentos e instalacións clandestinas, e
para que as referidas competencias se exerciten na forma máis conveniente
para salvagardar os seus valores naturais.
l)
Elaborar, aprobar e modificar o seu propio Regulamento de Réxime Interior,
fixando as directrices xerais da súa actuación e cantas recomendacións
estime oportunas para o seu mellor funcionamento.
m)
Delegar na Comisión Permanente cantas funcións estime conveniente, debendo
despois esta dar conta da súa xestión ao Pleno.
n)
Delegar no secretario aquelas competencias que por considerárense de puro
trámite así se acorde, debendo este dar conta ao Pleno na primeira sesión
que se celebre.
ñ)
Establecer comisións de traballo específicas para o estudio, xestión ou
preparación de temas concretos, determinando a súa composición, obxectivos e
vixencia.
o)
Distribuír e administrar os fondos da Xunta Consultiva.
p)
Promover e realizar cantos actos, iniciativas e xestións considere
convenientes para fomentar o mellor coñecemento de todos aqueles aspectos
que garden relación co Parque Natural e a consecución dos seus fins,
incluíndo os de difusión e información dos seus valores, así como os
programas de formación e educación ambiental.
q)
Colaborar coa Consellería de Medio Ambiente e Desenvolvemento Sostible na
promoción e proxección exterior do Parque Natural e dos seus valores e, en
xeral, promover e realizar cantas xestións se consideren oportunas a prol do
mesmo.
Artigo 8º
1 -
A Comisión Permanente reunirase ordinariamente unha vez cada semestre,
alomenos, e cando así o decida o presidente.
2 -
A Comisión Permanente poderá asumir todas aquelas competencias e funcións
que expresamente lle sexan delegadas polo Pleno, sen prexuízo de que este
poida reservarse o coñecemento e ratificación de cantos asuntos estime
oportunos.
3 -
Ás reunións da Comisión Permanente poderán asistir voluntariamente, con voz
e voto, tódolos membros do Pleno.
4 -
É función da Comisión Permanente informar como trámite previo ao informe do
Pleno e posterior aprobación pola Dirección Xeral de Conservación da
Natureza, todo proxecto de obras, traballos ou aproveitamentos que non
figuren no Plan Rector de Uso e Xestión, nas súas revisións, ou nos Plans
Especiais.
5 -
A Comisión Permanente poderá convocar ás súas sesións a outros membros da
Xunta Consultiva que non formen parte da mesma, así como a técnicos ou
especialistas dos que a súa presencia sexa considerada necesaria ou conveña
por razón da especialidade dos asuntos a tratar. Os convocados que non sexan
membros da Xunta Consultiva asistirán ás reunións con voz, pero sen voto, e
só asistirán á parte da sesión na que corresponda debater o asunto para o
que se lles requira.
6 -
Dos acordos adoptados pola Comisión Permanente deberá dar o secretario conta
ao Pleno na primeira reunión deste, previo envío aos vogais do borrador da
acta da sesión correspondente.
Artigo 9º
1 -
O presidente da Xunta Rectora, que é designado polo Conselleiro de Medio
Ambiente e Desenvolvemento Sostible a proposta do Director Xeral de
Conservación da Natureza, terá as seguintes funcións:
a)
Exercer a representación do órgano.
b)
Acordar a convocatoria das sesións ordinarias e extraordinarias e a fixación
da orde do día, tendo en conta, de ser o caso, as peticións dos demais
membros formuladas coa suficiente antelación.
c)
Presidir as sesións, moderar o desenvolvemento dos debates e suspendelos por
causas xustificadas.
d)
Dirimir co seu voto os empates, co obxecto de poder adoptar acordos.
e)
Asegurar o cumprimento das leis e dos acordos tomados pola Xunta Consultiva
e a Comisión Permanente.
f)
Visar as actas e certificacións dos acordos do órgano colexiado.
g)
Exercer a inspección da Xunta Consultiva e das súas actividades.
h)
Fiscalizar a utilización dos fondos da Xunta Consultiva.
i)
Referendar os comunicados e notas que vaian ser difundidos polos medios de
comunicación social.
j)
Xestionar a concesión de toda clase de axudas e subvencións que se
consideren axeitadas para os fins da Xunta Consultiva e do Parque Natural.
k)
Exercer todas aquelas funcións inherentes á súa condición de presidente do
órgano colexiado.
2 -
En caso de ausencia ou enfermidade e, en xeral, cando concorra algunha causa
xustificada, o presidente será substituído polo vicepresidente. En ausencia
de ambos, polo membro máis antigo da Xunta Consultiva ou, de seren varios da
mesma antigüidade, polo de máis idade.
3 -
O presidente poderá, de forma xeral ou para actos específicos, delegar
funcións nalgún dos restantes membros da Xunta Consultiva.
Artigo 10º
1
- A Xunta Consultiva contará cun vicepresidente, que terá as seguintes
funcións.
a)
Substituír ao presidente en caso de ausencia, vacante, enfermidade,
ou outra causa legal sobrevida.
b)
Auxiliar ao presidente no desempeño das súas funcións.
c)
Exercer as funcións que o presidente lles delegue.
Artigo 11º
1
- A Xunta Consultiva terá un secretario, que será un funcionario da
Delegación Provincial da Consellería de Medio Ambiente e Desenvolvemento
Sostible en Pontevedra, e que actuará con voz pero sen voto.
2 -
O secretario da Xunta Consultiva serao tamén da Comisión Permanente.
3 -
Serán funcións do secretario:
a)
Asistir ás reunións.
b)
Efectuar a convocatoria das sesións do órgano por orde do presidente, así
como as citacións aos membros do mesmo.
c)
Recibir os actos de comunicación dos membros co órgano e, xa que logo, as
notificacións, peticións de datos, rectificacións ou calquera outra caste de
escritos dos que deba ter coñecemento.
d)
Preparar o despacho dos asuntos, redactar e autorizar as actas das sesións e
repartilas oportunamente aos seus membros.
e)
Expedir certificacións das consultas, ditames e acordos aprobados e
notificar os mesmos.
f)
Levar os libros de rexistro de entrada e saída de documentos.
g)
Levar a contabilidade dos ingresos e gastos cuxa administración corresponda
á Xunta Consultiva.
h)
A responsabilidade da conservación, ordenación e control dos documentos da
Xunta Consultiva.
i)
Dilixenciar e realizar os pagos que periodicamente correspondan, ou os que
se deriven de acordos específicos tomados pola Xunta Consultiva.
k)
Dar conta do cumprimento dos acordos adoptados polo Pleno na sesión
anterior.
l)
Cantas outras funcións sexan inherentes á súa condición de secretario.
3 -
O secretario poderá ser auxiliado no seu cometido por persoal da Xunta
Consultiva ou el que adscriba o asigne para elo a Delegación Provincial da
Consellería de Medio Ambiente e Desenvolvemento Sostible en Pontevedra, co
coñecemento e aprobación da mesma.
4 -
En caso de ausencia ou enfermidade e, en xeral, cando concorra algunha causa
xustificada, o secretario será substituído polo director do Parque Natural
ou, en ausencia deste, polo membro máis moderno da Xunta Consultiva ou, de
seren varios da mesma antigüidade, polo de menos idade.
Artigo 12º
1 - A Xunta Consultiva poderá contar
para a xestión e realización dos seus cometidos cos medios económicos que
proveñan de contribucións voluntarias de organismos, entidades e
particulares, das actividades que, sen carácter mercantil, teñan fixadas
contraprestación ou retribución, e de calquera outra fonte legal de
ingresos.
2 -
A forma de administrar os fondos da Xunta Consultiva será decidida polo
Pleno, mais, en todo caso, corresponderá ao presidente e mailo secretario ou,
alomenos a este último en unión doutro membro da Xunta Consultiva,
dilixenciar e realizar os pagamentos.
Artigo 13º
1 -
O presente Regulamento de Réxime Interior entrará en vigor ao día seguinte
da súa aprobación polo Pleno.
2 -
Para calquera modificación do Regulamento de Réxime Interior será necesario
o voto favorable de alomenos dous tercios do Pleno da Xunta
Consultiva.
|
