VISITA DO 07-04-2012

      Xa ía para un ano que non visitabamos esta magnífica zona do Baixo Miño que, xunto coa Valga (Oia), forma un dos humedais mellores e máis ricos que ten a comarca.

   Nesta ocasión acompañáronos dous colegas, que teñan interese en coñecer algunha das zonas especiais que temos nesta parte de Galicia e, pensamos, que quedaron moi satisfeitos desta visita pola cantidade de especies que puideron ver.

   Na fotografía, de esquerda á dereita: Dorado; Anxos; Martiño; Ricardo, Peque, Ricardo e Tin (agachado), posando como é habitual en tódalas saídas efectuadas polo grupo de traballo.

     A pesares da sequía, o regato que cruza Pinzás e orixina un dos ríos que hai no Baixo Miño (Cereixo), levaba auga suficiente para manter húmidas as beiras e albergar unha interesante fauna, coma puidemos apreciar no tempo que estivemos nesta chaira asulagada.

     O anfibio máis escaso que, hoxe por hoxe, temos na comarca é o Lissotriton helveticus, Pintafontes palmado. Pinzás é un dos escasos lugares no que o temos localizado e, cada vez que o podemos observar, constitúe un acontecemento e un dos momentos máis agradables para nós.

Andivemos na procura do sapiño parteiro (Alytes obstetricans), e non tardamos en dar con el, sobre todo gracias a Peque que ten un especial don para estes animais. Como vemos na fotografía, algúns dos exemplares que observamos cargaban cos ovos á espalda.

Tampouco faltou o sapiño pintoxo (Discoglossus galganoi), como o exemplar da fotografía. Este anuro parece empezar a escasear no Baixo Miño.